Siglir tar il cuntegn
Inhalt

Engiadina Fin per la pendiculara da Lagalb

Las pendicularas Engiadina Mountains serran la pendiculara da Lagalb per la fin da l'enviern 2015/16. Ils deficits annuals na sajan betg pli supportabels, di la direcziun.

La pendiculara da Lagalb durant la stagiun d'enviern
Legenda: Fin per la pendiculara da Lagalb a Puntraschigna La pendiculara da Lagalb vegn ad esser en funcziun mo anc durant il proxim enviern. Engadin St. Moritz Mountains / Prisca Baur

L'interpresa Engiadina Mountains serra la pendiculara da Lagalb a Puntraschigna per la fin da l'enviern 2015/16. La pendiculara vegn serrada e demontada, quai ha communitgà la direcziun dad Engiadina Mountains a la radunanza generala.

La pendiculara da Lagalb exista dapi l'onn 1963. La pendiculara n'haja dentant mai rendì. Era betg suenter las ultimas investiziuns da radund 7 milliuns francs dapi l'onn 2007. Dapi lura haja la pendiculara generà ina perdita da passa 10 milliuns francs. Uschia na saja la gestiun da Lagalb betg pli da responsar, ha ditg la direcziun dad Engiadina Mountains. Perquai stoppia l'interpresa serrar la pendiculara l'enviern 2015/16, sch'i na gartegia betg da chattar investiders che surpigliassan ils deficits annuals.

Perdita per Engiadina Mountains

Era l'entira interpresa Engiadina Mountains annunzia ina perdita annuala per l'onn da gestiun 2013/14. L'interpresa annunzia in minus da 4% tar la frequenza da skiunzs ed ina perdita da radund 366'000 francs.

La direcziun dad Engiadina Mountains appellescha perquai da sustegnair projects d'hotels en Engiadina. Engiadina Mountains vul sa concentrar durant ils proxims onns sin las 3 pitgas Corviglia, Muottas Muragl e Diavolezza.