Sco ch’ins enconuscha quai da Helge Schneider, ha spetgà in concert da surpraisa en il Dracula Club a San Murezzan. L’um da 66 onns è numnadamain enconuschent per improvisar sias preschentaziuns. Era il fatg ch’il musicist ha decis spontan da sunar sulet ha influenzà la saira, uschia ch’ins ha pudì vesair ina maschaida da musica da Jazz, Pop, Blues, Samba – en cumbinaziun cun sgnoccas ed istorgias spontanas. Ils instruments sin il palc (clavazin, ghitarra, saxofon, cuntrabass, battaria e vibrafon) ha Helge Schneider sunà tuts sez ed uschia persvas in local plain.
Avant che jau vegn sin il palc na sa jau betg tge ch’i vegn a capitar.
Helge Schneider n’è però betg be in entertainer che fa il clown sin il palc. El fa patratgs da bleras chaussas e vul cun sia lavur confruntar e provocar il public. Era sch’el ha in’atgna lingua vul il musicist da Jazz tudestg, che sia lavur vegnia chapida da tuts.
A San Murezzan è Helge Schneider gia per la quarta giada. Quest onn na stat l’entertainer betg mo sin il palc dal Festival da Jazz, el è era pledader a la festa dal prim d’avust. Ina preschentaziun ch’è dal rest er improvisada. Ina tala festa saja segir impurtanta per l'identitad dal pievel svizzer, ed era tschertas tradiziuns fetschian senn. El na saja però betg ina persuna ch’è loscha d’esser d’ina tscherta naziunalitad.
Jau na vuleva mai acceptar cunfins – oravant tut en in mund talmain globalisà e collià sco ozendi.
Il concert da Helge Schneider è stà l’ultim da bunamain 60 concerts da questa 15avla ediziun dal Festival da Jazz a San Murezzan.
