Siglir tar il cuntegn
Inhalt

Engiadina Festa da Nossadunna per ils Talians en Engiadina

Dapi passa 20 onns festegian surtut giasts da l’Italia il di il pli aut da festa en la baselgia catolica: Nossadunna aut sin las muntognas. Sper la messa è er il sa scuntrar mintg’onn puspè il punct impurtant da quel di.

messa catolica
Legenda: La messa sut tschiel liber en occasiun da Nossadunna en Engiadina, attira surtut a giasts talians. RTR, Anna Caprez

Inizià la festa en occasiun da Nossadunna, aveva Don Peppino Arosio barmier avant passa 20 onns a Zuoz. Cun ina messa e suenter in gentar al buffet aveva il prer attratg fin 1'000 persunas a la festa da «Ferragosto» che era drizzada surtut als Milanais.

Midament al timun

Suenter dus onns aveva il spiritual da Schlarigna dischlocà las festivitads sin 2’278 meters sur mar, gist sper la staziun da muntogna da Marguns che sa chatta en il territori da skis sur Schlarigna. Suenter la mort da Don Peppino è l’organisaziun sa midada, sco er il numer da talians sin la muntogna.

altar sin muntogna
Legenda: Il altar provisoric sut tschiel liber per ils trais spirituals cun lur ministrants. RTR, Anna Caprez

La messa daventa secundara

Tuttina vegnan anc adina bun 250 persunas sin la muntogna per visitar la messa manada da trais prers. La prioritad ha tar blers dentant il fatg, ch’ins s’inscuntra mintg’onn puspè cun amis ed enconuschents durant las vacanzas da stad en Engiadina. Preschent a la messa è surtut anc la generaziun pli veglia. La messa ha lieu sut tschiel liber, e quai ina giada en talian e tudestgs ed ina sulettamain en talian.