Il museum en il liber Ballenberg ha envidà l’emprima giada ad in inscunter da generaziuns. Durant duas fins d’emna (24 / 25 da settember e 1. / 2 d’october 2022) ha lieu in festival da las tradiziuns d’atun en Svizra.
Da la partida èn per il Grischun surtut las valladas dal sid cun la Val Müstair, la Val Bregaglia, la Valposchiavo e la Mesolcina. Per pudair preschentar lur products tipics, lur tradiziuns ed auter dapli hai vulì ina detga organisaziun, di David Spinnler ch'è involvì en l’organisaziun dals Jauers per viagiar a l’eveniment en il chantun Berna.
La pli gronda sfida è da coordinar ed organisar il transport da tut nossa rauba a Ballenberg, e da chattar in alloschi per las radund 100 persunas da la Val Müstair durant quella festa.
Chastognas cun groma empè da popcorn
Mintgina da las quatter valladas grischunas porscha durant la «Festa da las festas» buntads culinaricas. La Val Bregaglia è tranter auter preschenta cun total 1’000 chastognas che vegnan servidas cun groma durant la represchentaziun da kino a Ballenberg.
Il tratg tipic da la Val Poschiavo «Pizzoccheri» datti da sagiar tar ils Puschlavins durant las proximas duas emnas. Ed ils da la Val Müstair vegnan a vender burgers en la copia originala da l’Alp Champatsch a Ballenberg.
Tradiziuns e manufacturas
Per mussar dapli da las tradiziuns localas viagia in’entira delegaziun da Jauras e Jauers en il chantun Berna. En tut ina 100ina da persunas – tranter auter persunas da l’uniun da musica, da la Tessanda Val Müstair u er 30 scolaras e scolars da la 5 e 6avla classa che vegnan a chantar chanzuns durant l’eveniment.
Or da l'archiv
