Cun in ultim inscunter dals represchentants dals ultims onns en ils differents circuls en Grischun, vul ins pigliar cumià d’ina era ch’è ida a fin ils 31 da december 2015. Cun ils circuls che n’existan betg pli, svaneschan era tradiziuns per dal bun sco per exempel la mastralia.
Pass logic ed inevitabel
Tenor la presidenta dal comité d’organisaziun da la festa da cumià a Zernez, Brigitt Hitz, n’èsi betg pli stat ina gronda surpraisa ch’ils circuls vegnan abolids. Durant ils onns 2000 fin 2010 haja numnadamain dat successivamain ina reducziun da las cumpetenzas dals circuls en Grischun, ha declerà la deputada. En in emprim pass vev’ins furmà las novas regiuns, pauc temp suenter na faschevan ils presidents cirquitals betg pli part dal Cussegl Grond. Uschia ch’els n’avevan era betg pli influenza directa durant las sessiuns.
Cudesch per sa regurdar
Per documentar l’existenza e la funcziun dals 39 circuls en Grischun che han represchentà ils basegns e giavischs da las 150 differentas vals, han ils organisaturs edì in cudesch. Quel cuntegna ina descripziun da mintga singul circul e declera era la structura politica decentrala, avant ch’ins ha furmà las novas regiuns.
Festa cun cortegi tras Zernez
Cun ina festa vul ins sa regurdar dals circuls en il chantun Grischun e da lur istorgia e prender cumià. Sper ils davos presidents cirquitals e landammas è er la populaziun envidada da sa participar al cortegi tras Zernez cun in aperitiv en il auditori dal Parc Naziunal Svizzer.
Il act festiv ha lieu in sonda, 28 da matg 2016 a partir da las 13:30 h a Zernez.
