137 kilometers sin vias champestras, sur pass ora, tras guauds e sper prada e vitgs vi – quai è il traject dal Bike-Maraton enturn il Parc Naziunal Svizzer. Esser pront sin il grond di è ina sfida per ils organisaturs. Oravant tut perquai che las malauras avevan devastà questa stad il traject en divers lieus.
Ils trais puncts neuralgics èn:
- Val S-charl (Scuol): La via da la Val S-charl era vegnida devastada sin plirs kilometers. Grazia al grond engaschament da la vischnanca da Scuol è quella part uss puspè bain transibla. Pervi da las malauras è la via pli loma sco auters onns. Ir sin quest traject vegn ad esser pli grev.
- Val Mora (Val Müstair): Er in Val Mora han devastà trais bovas il traject dal Bike-Maraton. Là ha la gruppa da lavur da la vischnanca da Val Müstair procurà, ch'era questa part da la via è uss en in bun stadi per traversar cul bike.
- Pass Chaschauna (Livigno – S-chanf): Da la vart da Livigno è il traject en fitg bun stadi. Da la vart vers S-chanf è la gruppa da lavur da la vischnanca da S-chanf anc vidlonder da refar ils donns da las ultimas malauras. Enfin il di da la cursa prevesan ils organisaturs d’esser pronts. Il president dal comité d'organisaziun Claudio Duschletta propona da descender dal bike e chaminar. Be fitg buns bikers duajan ristgar da restar sin il bike.
La prevista da l’aura è buna per l’emna avant il 16avel Bike-Maraton. Quai fa speranza ch'i na dettia betg pli surpraisas e che la cursa po vegnir manada tras sin il traject original enturn il Parc Naziunal Svizzer.
RR actualitad 17:20