La mancanza d’abitaziuns per indigens en l'Engiadin’Ota daventa pli e pli problematica. Rinforzà quest problem haja er la pandemia. La dumonda per abitaziuns da vacanzas è numnadamain creschida ed uschia èn diversas abitaziuns vegnidas vendidas l'ultim temp.
Problem regiunal
Sco Andrea Gilli, il president da la regiun Malögia ha ditg ad RTR, na saja la mancanza d’abitaziuns per indigens betg be in problem per las singulas vischnancas, mabain per tut la regiun.
Il martgà d’emprimas abitaziuns è ina tematica regiunala. Per prender per mauns quella problematica duvrain nus però ina strategia.
La conferenza da presidents da la regiun Malögia ha decis unanimamain da laschar analisar la situaziun. La dita EcoAlpin elavurescha pia in studi per avair ina basa da discussiun.
Segl activ
Singulas vischnancas reageschan tranter auter cun relaschar zonas da planisaziun. La vischnanca da Segl ha decis d’adattar la lescha communala da segundas abitaziuns, uschè Barbara Aeschbacher, la presidenta communala.
Nus vulain prender mesiras cunter la mancanza d’emprimas abitaziuns e discutar la problematica ensemen cun la populaziun.
Engiadina Bassa er pertutgada
Er en Engiadina Bassa è la problematica enconuschenta. La Regiun ha perquai surdà l'incumbensa per in studi che duai examinar l'attractivitad da la regiun per giuvens creschids. In aspect vegn era ad esser la situaziun d'abitaziuns. Ils resultads duain vegnir publitgads durant il segund quartal dal 2022.
Reagì ha era la vischnanca Valsot. Ella ha decidì d'adattar la planisaziun communala per promover emprimas abitaziuns e per evitar la vendita da stallas sco segundas abitaziuns.
