Tenor Grischun Vacanzas pon ins trair ina bilantscha negativa dals dis da festa. Cifras definitivas n'èn però betg anc sin maisa. Martin Vincenz, il CEO da Grischun Vacanzas discurra d’ina media grischuna da 30-40% damain giasts. Ins po però constatar differenzas regiunalas, sco l'exempel da l'Engiadina Bassa mussa.
En la regiun Engiadina Bassa datti grondas differenzas tranter las regiuns da skis: Samignun che parta la regiun da skis cun Ischgl tira ina bilantscha fitg negativa. Quai causa che Ischgl n'ha betg pudì avrir sia vart dal territori. Percunter tira la regiun da skis Motta Naluns ina bilantscha pli positiva. Cun radund 20% damain giasts è ella sur la media grischuna. Il directur da la regiun da skis Motta Naluns, Andri Poo, è conscient dal minus e tuttina è el cuntent. Sco quai ch’el di hai dà onns pli nauschs – er senza corona. La stagiun saja però anc lunga ed i saja memia baud per trair bilantscha e per far prognosas. La directura da turissem da la regiun, Martina Stadler, conferma in regress da 30-40% dals giasts en la regiun.