Suenter ch'igl ha dà plirs accidents sin ils lais schelads da l'Engiadin'Ota avertescha la Polizia chantunala dad esser precaut. Il glatsch nair haja attratg ils ultims dis blers visitaders, la situaziun sin ils lais saja però fitg privlusa, cunquai che quels na sajan betg schelads tras dapertut u hajan schizunt foras, communitgescha la polizia.
La Polizia chantunala appellescha perquai a la populaziun da betg ir sin il glatsch che paria segir. Tgi che fetschia tuttina quai, fetschia quai sin agen ristg. Ils ultims dis hai adina puspè dà accidents sin ils lais da l'Engiadin'Ota, perquai che persunas èn rutas tras il glatsch. Pliras persunas èn uschia vegnidas blessadas levamain, ina dad ellas er grevamain.
Duas persunas cun sfradentadas
La sonda da mezdi èn dus velocipedists crudads tras il glatsch en l'aua, sin il Lai da Segl. Quai ha la Polizia chantunala confermà ad RTR. La Rega ha sgulà las duas persunas pervi ch'ellas eran sfradentadas en ils ospitals a Samedan ed a Cuira. Sch’ellas han anc ulteriuras blessuras, n'ha la Polizia chantunala betg pudì dir.
Ils velocipedists n’èn betg las sulettas persunas ch’èn gia ruttas tras il glatsch dal Lai da Segl. Gia la gievgia èn dus peduns ruts en il glatsch.
RTR novitads 16:00