Durant dus dis ha ina interpresa spezialisada sin liquidaziuns organisà ina vendita en l’anteriur hotel. Radund 100 persunas eran sa radunadas avant porta tar l’emprim’ura da la liquidaziun da tut l’endrizzament. Ils ins cun plans concrets, auters èn passads or da spir mirveglias.
Da portas veglias, sur letgs e differents accessoris....
La schelta è stada multifara: dad entiras cumbinaziuns en lain, portas veglias, ina bar, sur letgs, maschinas en cuschina, differents accessoris en fier, fin tar vaschella e pusada era fixà vi da mintga toc in pretsch directiv.
Nagins gronds cumbats
Ensemen cun ils vendiders, adina pronts cun lur blocs da quittanza, èn ils interessents svelt vegnids perina. Gronds cumbats n’haja quai betg dà per blera rauba, ha declerà l’anteriur possessur dal hotel Daniel Bosshard.
Ina gruppa d’investiders possedia uss l’edifizi, che duai vegnir reconstruì entaifer dus onns. Suenter duain esser abitaziuns ed in pitschen café sut il nov tetg.