Siglir tar il cuntegn
cuntegn

Engiadina En segund chatsch deliberà messadi per credit plazza aviatica

En la segunda lectura era tut cler ed ils commembers dal Cussegl cirquital d'Engiadin'Ota han deliberà unanimamain il messadi per in credit da 8.5 milliuns francs per renovar la plazza aviatica. En tut duain vegnir investì 22 milliuns francs ils proxims tschintg onns.

plazza aviatica
Legenda: Uss sto mo pli la populaziun dir gea al credit per renovar la plazza aviatica a Samedan mad

La summa sa cumpona dal credit d'impegn da las vischnancas d'Engiadin'Ota sur 8.5 milliuns francs, 9.5 milliuns francs è chapital ester e 4 milliuns vegnan dal chantun Grischun e la Confederaziun.

Vischnancas portan il ristg

Las vischnancas portan il ristg finanzial dal chapital ester da 9.5 milliuns francs e la contribuziun da la Confederaziun da 2 milliuns.

Tar l'emprima lectura, il december da l'onn passà era quai il punct da critica principal. Il fatg ch'igl era betg cler tgi che surpiglia la garanzia. Uss è quai sclerì: las vischnancas d'Engiadin'Ota.

Il Cussegl cumön ha alura deliberà il messadi senza cuntravusch.

Refusà dumonda d’augmentar credit d'impegn

Il president communal da Segl ha fatg la proposta d'auzar il credit d'impegn da 8.5 milliuns francs sin 14 milliuns. Cusseglier Hansjörg Hosch ha proponì d'ir sin 12 milliuns. Finanziar uschè bler pussaivel savess, enstagl d'ir èn il ristg ch'ils tschains per amortisar il credit dal chapital ester creschian.

Questa proposta è dentant vegnida refusada cun 26 cunter 4 vuschs. Il messadi vegn avant la populaziun sco proponì dal circul, quai ils 26 mars da quest onn.

RR novitads 17:00