Siglir tar il cuntegn
cuntegn

Engiadina En il Bike Maraton 2017 è quest onn integrà il campiunadi svizzer

En la 16avla ediziun dal Bike Maraton dal Parc Naziunal Svizzer è integrà era il campiunadi svizzer. Suenter che Swiss Cycling aveva dacurt desditg la cursa per il campiunadi svizzer han uss ils responsabels dal Bike Maraton declerà d'integrar la cursa en il Bike Maraton da quest onn.

Da sanestra Claudio Daguati, Claudio Duschletta (president) e Martina Hänzi dal comité d’organisaziun dal Bike Maraton cun uffants che han preschentà la cursa per ils pitschens
Legenda: Da sanestra Claudio Daguati, Claudio Duschletta (president) e Martina Hänzi dal comité d’organisaziun dal Bike Maraton cun uffants che han preschentà la cursa per ils pitschens Reto Mayer

Dapi quest onn è Claudio Duschletta il nov president dal comité d’organisaziun dal Bike Maraton dal Parc Naziunal. Vi da la cursa sco tala na datti nagins midaments. Midadas percunter datti en la sparta communicaziun. Uschia è vegnida realisada ina nova pagina d’internet. Plinavant è vegnida rinforzada la preschientscha sin ils chanals dal las medias socialas.

Kids Race sco attracziun en l’arrivada

Per promover la giuventetgna e per far vegnir pli attractiv l’arrivada ha lieu quest onn per l’emprima giada ina cursa per uffants fin a 15 onns. Il traject ha ina lunghezza da 1,5 kilometers e sa chatta en vischinanza da l’arrivada a Scuol Gurlaina. Dasper quai datti tar l'areal da l’arrivada ina tenda cun sequenzas live da la cursa. Quels maletgs pon ins era vesair online sco Live Stream.

RR actualitad 12:00