Siglir tar il cuntegn
cuntegn

Engiadina Emprima badigliada per tur cotschna sin pass dal Güglia

Il fundament per il nov project dad Origen e Giovanni Netzer sin 2’300 meters sur mar è fatg. En preschientscha da radund 60 persunas han ins cumenzà cun la realisaziun da la tur. L’aura bletscha e fraida ha gist mussà sut tgeninas circumstanzas ch’il fabricat pudess tut tenor vegnir realisà.

Giovanni en la plievgia cun sia tur
Legenda: Sisum il pass, ma en la plievgia: Giovanni Netzer, l’intendant dad Origen, cun il model da sia tur. RTR, David Truttmann

Per il pli aut grischun, Michael Pfäffli, che ha er gidà tar l’emprima badigliada, è il project d’ina tur da 30 meters autezza insatge spezial che vegnia a colliar anc dapli las differentas regiuns dad ina e da l’autra vart dal pass dal Güglia.

Plans ambizius

Gia per la fin da fanadur 2017 duai la tur da lain esser pronta. La construcziun che vegn montada sin ina soletta, cuntegna grondas fanestras da loscha e duai colliar la natira e la cultura. L’aura vegnia ad esser la pli gronda sfida ha declerà Enrico Uffer da l’interpresa Uffer, che è incumbensada cun la part en lain da la tur.

La finanziaziun da l’emprima etappa da construcziun da 2,2 miu francs è garantida. Per la segunda etappa, ch’avess da succeder l’atun, è Origen anc a la tschertga da raps en l’autezza da radund 600’000 francs. Sin la stad stat però la tur, ils 31 da fanadur 2017 è planisada la premiera da l’opera «Apocalypse» da Gion Antoni Derungs – en preschientscha da cusseglier federal Alain Berset.

RR actualitad 07:00