Siglir tar il cuntegn

Engiadina Emprima badigliada per nova basa Bernina

Sin il pass dal Bernina cumenzan las lavurs da construcziun per la nova basa per il mantegniment da las vias da l'uffizi da construcziun bassa dal Grischun, district 3.

basa mantegniment vias sin il pass dal Bernina
Legenda: Il model da la nova basa chantunala sin il pass dal Bernina. mad

La construcziun nova da la basa per il mantegniment da las vias permetta da meglierar considerablamain las relaziuns localas e las premissas per in servetsch da mantegniment da las vias effizient ed economic sin la via dal pass dal Bernina. Ina part essenziala vegn a contribuir er il silo cun in volumen da 475 meters cubic per depositar sal e crapella.

Pass avert tut onn dapi il 2007

La via chantunala sur il pass dal Bernina, cun in punct culminant da 2328 meters sur mar, collia la Val Puschlav cun l'Engiadin'Ota. Fin ils onns 1960 era la via da princip serrada durant l'enviern. Suenter l'onn 1965 eran las vischnancas da Brusio e da Puschlav autorisadas da tegnair avert la via dal pass durant l'entir onn per il traffic motorisà.

Dapi la primavaira 2007 è l'uffizi da construcziun bassa dal Grischun, district 3, cumpetent e responsabel per l'entir mantegniment da la via dal pass dal Bernina. Per in mantegniment da la via effizient mancan oz locals moderns.

Edifizi per part sut terra

Ina fatschada ondulada da betun natiral e la tur dal silo che stat suletta vegnan a definir da nov il lieu sin la via dal pass dal Bernina. Tut ils locals che sa chattan davos la fatschada ondulada, èn cuvrids cun terra, uschia ch'i vegn pussibilità da renatiralisar il lieu.

Bain organisà per il diever

Ils novs locals furman ina retscha en dependenza da lur diever:

  • deposit da gas
  • alloschi dal manaschi 1
  • magasin
  • lavandaria d'autos
  • silo
  • hallas da parcar
  • local da segiurn
  • alloschi dal manaschi 2 e tanc

Il temp da construcziun da l’edifizi dura bundant 2 onns e custa var 10 milliuns francs.

RR novitads 14:00