Siglir tar il cuntegn

Header

video
San Murezzan: I dovra in segund scruttini per il post da presidi
Or da Telesguard dals 23.09.2018.
laschar ir. Durada: 4 minutas 28 Secundas.
cuntegn

Elecziuns San Murezzan 15 vuschs als spartan – Asprion vs. Jenny va en la segunda runda

La tensiun per il presidi communal cuntinuescha: Asprion e ses sfidader Jenny han dad ir ils 7 d'october en in segund scrutini. Tar ina maioritad absoluta da 829 vuschs ha il sfidader Christian Jott Jenny fatg 824 vuschs, il president communal actual Sigi Asprion percunter be 809.

Il cumbat electoral per il presidi aveva procurà per emnas plain tensiun a San Murezzan – e quella tensiun va vinavant. I dat in segund scrutini. Nagin dals dus candidats ha cuntanschì la maioritad absoluta dad 829 vuschs.

La cursa vegn vairamain cnappa:

824 vuschs: Christian Jott Jenny, l'intendant dal Festival da Jazz da San Murezzan, ha procurà er gia cun il resultat da la dumengia per in'ulteriura surpraisa politica. Cun sia candidatura n'ha el betg be dà moviment en il cumbat electoral ma er activà il suveran. En l'emprim scrutini realisescha Jenny schizunt dapli vuschs ch'il president communal actual.

Che be tschintg vuschs manchian per far clera la situaziun sechia a Christian Jott Jenny. El avess gì pli gugent fatgs clers, ma quai saja dad acceptar uschia. Uss saja anc ina giada da far cler, ch'ins sappia «far ei meglier» sco enfin da qua, ha el ditg en l'intervista cun RTR:

audio
«Es nervt» di Christian Jott Jenny
ord Actualitad dals 23.09.2018.
laschar ir. Durada: 2 minutas 56 Secundas.

809 vuschs: Sigi Asprion, il president communal actual, è la varianta enconuschenta dapi ils davos otg onns. Tuttina n'ha el betg pudì persvader il suveran ed ha dad ir en in segund scrutini.

Ins stoppia discurrer dad in resultat pli u main identic tranter els dus. Perquai stoppia el far uss patratgs co ch'el savess preschentar meglier quai ch'el haja cuntanschì enfin uss, ha in Sigi Asprion plitost dischillusiunà ditg en l'intervista cun RTR:

audio
«Ernüchtert» sa mussa Sigi Asprion
ord Actualitad dals 23.09.2018.
laschar ir. Durada: 2 minutas 5 Secundas.

Uschia è a San Murezzan entant cler be ina: In emprim success ha Christian Jott Jenny cuntanschì cun sia candidatura – numnadamain activà il suveran a sa participar al process politic. Il biro da votaziuns ed elecziuns da San Murezzan ha communitgà ina participaziun da 69,26% a l'elecziun.

Il segund scrutini è fixà per ils 7 d'october.

RR novitads 13:00+

Artitgels legids il pli savens