La fin da quest mais datti en pliras vischnancas elecziuns communalas. Quai era a Samedan ed a Puntraschigna. Causa corona na datti per exempel a Puntraschigna nagina radunanza d’elecziuns mabain in’elecziun a l’urna. Per il post dal president communal datti dus candidats, Gian-Franco Gotsch e Nora Saratz Cazin.
La situaziun actuala da corona ha midà er per els ils cumbat electoral. La discussiun al podium ch'era planisada han ins stuì stritgar. Tras quai han ils candidats stuì chattar alternativas per chattar il contact cun la populaziun e per survegnir vuschs.
L’effect da corona ves’ins era en gasetta. Plirs candidats per elecziuns communalas emprovan da cuntanscher la populaziun cun inserats.
Quai fa era la candidata Nora Saratz Cazin da Puntraschigna. Ses concurrent Gian-Franco Gotsch spera entant sin il fatg che la populaziun stuess gia enconuscher el suenter 12 onns en la politica communala. Perquai n'ha el nagins inserats en gasetta.
Las medias socialas èn segund els dus er in agid en questa situaziun speziala per derasar lur posiziun politica e motivar d’ir a l’urna. Tuts dus candidats vesan er in factur positiv en la midada da la radunanza d’elecziun en in’elecziun a l’urna. Questa midada pussibilitescha a tuts da dar lur vusch.
