Gian Sutter maina dapi 15 onns la butia cun products agriculs sin ses bain puril a Samedan. En tut quels onns n’ha el mai fatg ina svieuta uschè gronda sco durant il temp da corona. Oravant tut haja quai da far cun il fatg, che la glieud ha dapli temp. Tenor il pur da 52 onns fan numnadamain bleras famiglias in’excursiun sin il bain puril e cumpran uschia gist en en la butia.
Sfida d’avair products adina avant maun
Che la butietta fa actualmain il dubel da la svieuta bada Gian Sutter er tar la lavur. Uschia fa el uss duas fin trais giadas l’emna chaschiel-chaura empè d’ina giada. Ed er tar ils products da charn ha el stuì reorganisar.
Per ils products da charn planisain nus mais oravant, cura ch'ils animals van tar il batger. Uss vain nus stuì purtar ina u l’autra bestga a curta vista tar il batger, per che nus possian emplenir las curunas.
Ovs fitg dumandads
Il product il pli dumandà è tenor Gian Sutter l’ov. Perquai ha el er cumprà ulteriuras giaglinas. Total ha la famiglia Sutter actualmain 400 giaglinas sin ses bain puril. Sco Gian Sutter suppona sa tracti tar il cumportament actual d'in trend temporar. Tuttina ha el grond plaschair da la svieuta e dals blers visitaders en ed enturn la butia e ses bain puril.
