La suprastanza communala da Segl consista oz dal president, il vicepresident e trais suprastants. Dasper quels datti anc duas suppleants che fan bain era part da la suprastanza ed han lur incumbensas, n'han dentant nagin dretg da vuschar.
La fin d'avust ha il suveran perquai midà la constituziun e fatg libra la via per integrar ils suppleants en suprastanza e cun quai augmentar la cifra da suprastants da tschintg sin set.
Ulteriuras incumbensas
Segl n'ha dentant betg mo vulì abolir la duas classas da suprastants, sco il president communal Christian Meuli declera envers RTR. Cun l'aboliziun dal circul ed il midament tar la Regiun Malögia datti novas incumbensas per las vischnancas. Las incumbensas en connex cun las novas organisaziuns purtadras per exempel da l'ospital, l'organisaziun da turissem u la plazza aviatica vul Segl uss reparter sin pliras spatlas.
Per las set plazzas en suprastanza candideschan otg persunas:
- Christian Meuli - president communal (vegl)
- Claudio Dietrich - vicepresident (vegl)
- Heidi Clalüna (vegl)
- Nico Röthlisberger (vegl)
- Alfred Breu (fin ussa suppleant)
- David Huber (fin ussa suppleant)
- Claudio Meuli (nov)
- Franziska Muggli Ulber (nov)
Era durant la radunanza communala pudessan dentant anc vegnir inoltradas candidaturas, di Christian Meuli. Cler è damai mo ch'i dat segiramain dapli candidats che plazzas en suprastanza.
RR actualitad 17:00