Ils cudeschs èn stampads e cumparan quests dis. L'istorgia da «Magdalenas Sünde» è in'istorgia d'amicizia, da deliberaziun, da fantasias, violenza ed obsessiuns sexualas. Cun quest'istorgia less la scriventa engiadinaisa divertir, dar novs purtrets a la lectura e far plaschair. Malgrà che l'istorgia raquinta era da varts tristas e violaziun, èsi la fin ina deliberaziun. «Provocaziun n'interessescha betg mai» di ella, dentant sche l'istorgia è ina provocaziun lura è ella simplamain quai.
Romana Ganzoni che viva cun sia famiglia a Schlarigna sa senta actualmain in pau sco ina maschina da marketing. Quai tutgia vitiers. Esser preschenta en medias socialas e far attent sin quai ch'ella fetschia. Dentant stoppia quai vegnir fatg cun gronda tgira. Pastrigliadas na verteschia ella betg. Sia marca: «Frisch und fründlich sco il Volg», di ella ed agiunta che sco scriventa, saja la marca Ganzoni «ina surpraisa». Surprendent è era l'inscunter cun ella. Lura, sch' ella manegia ch'inspiraziun vegnia survalitada. Quai saja savens plitost dira lavur che spetgar enfin che la musa cumparia.
En ses dachasa stat ella en cuschina e quai en chalzers dad aur, inscenescha la vita, raquinta da las figuras ord ses roman, cuschina spaghettis durant raquintar vinavant ed – ella po rir da sasezza. Insaco ina diva, dentant ina diva fitg patenta.