Duo per il turissem - Cun codirectori da Daguati ed Aeschbacher en il futur

La Turissem Engiadina Scuol Samignun Val Müstair SA (TESSVM) mantegna il co-directori cun Bernhard Aeschbacher e Claudio Daguati. Quai scriva l'organisaziun en ina communicaziun da medias. Ils ultims trais mais han ins fatg bunas experientschas cun questa schliaziun e perquai duai restar tar quest codirectori. Els avevan surpiglià il settember il timun da l'organisaziun turistica ad interim, suenter che la directura Martina Hollenstein Stadler aveva dà giu quest post. Omadus èn gia activs per la TESSVM dapi passa 10 onns ed enconuschan uschia bain l'interpresa sco era la regiun.