Siglir tar il cuntegn
Inhalt

Engiadina Duas marcas per il turissem da l'Engiadin'Ota

San Murezzan sco lieu extravagant ed urban, e l'Engiadina sco lieu che sveglia desideris. La destinaziun Engiadina San Murezzan lavura en avegnir cun questas duas marcas separadas.

Legende: Video Engiadin'ota – duas marcas per il turissem abspielen. Laufzeit 01:52 Minuten.
Or da Telesguard dals 14.12.2017.

Il cussegl administrativ da la destinaziun Engiadina San Murezzan ha decidì la nova strategia per il turissem en Engiadin'Ota. L'element central è ch'ins lavura en avegnir cun duas marcas separadas. Dad ina vart San Murezzan sco lieu extravagant ed urban, da l'autra vart l'Engiadina sco lieu che sveglia desideris.

Duas marcas – dus teams

Las duas marcas vegnan tgiradas da dus teams differents tar la destinaziun. Sco managers ha la destinaziun engaschà Marijana Jakic per la marca San Murezzan, ella vegn da la banca Julius Bär. Per la marca Engiadina ha la destinaziun engaschà sco brand manager Sandro Wegmann che ha lavurà enfin ussa tar Migros. Il motiv per lavurar en avegnir cun duas marcas separadas è ch'ins vul uschia posiziunar pli cler mintga marca per sasez.

Inputs da la populaziun

La destinaziun ha lavurà cun la metoda numnada "open innovation" ed ha creà ina plattafurma d'internet nua che mintgin ha pudì sa participar a la discussiun. 750 resuns sajan entrads uschia. E bleras persunas hajan giavischà da meglierar la situaziun da la marca. Enfin ussa avevi dà be ina marca, "Engiadina San Murezzan".

RR novitads 14:00