Siglir tar il cuntegn
cuntegn

Engiadina Dretg encunter dretg – a Scuol dat da discurrer in'iniziativa

In onn – quest temp conceda la nova constituziun da la vischnanca fusiunada Scuol per reagir sin iniziativas, far eventualas cuntrapropostas e laschar vuschar la populaziun silsuenter. Gia tar l’emprima iniziativa «Dapli per cumprar – damain per parcar» n’è questa procedura dentant betg pussaivla.

Fotografia d’ina ura da parcar
Legenda: L'iniziativa davart parcar gratuit ha inizià a Scuol ina discussiun da dretg tranter vischnanca ed iniziants. RTR, Gion Hosang

Tenor la vischnanca da Scuol n’èsi betg pussaivel da suttametter l’iniziativa entaifer la durada prescritta tenor constituziun communala, vul dir enfin il pli tard ils 28 da zercladur da quest onn.

La vischnanca è vi dad ina nova lescha da parcar

Il motiv: Suenter la fusiun è la suprastanza communala vidlonder ad evaluar ina nova lescha da parcar. Quella prevesa in concept da parcagi cumplet ed armonisà. In sboz da questa lescha, resguardond era differents puncts da l’iniziativa, duai tenor il president communal Christian Fanzun proximamain vegnir preschentà e sin il pli tard quest atun mess avant il pievel.

Cun quest pass sa basia la vischnanca da Scuol sin ina lescha da vischnanca chantunala. Quella metta ord vigur la constituziun communala, sche tschertas premissas èn dadas – vul dir sche la vischnanca n'ha betg impedi l’andament ed è activamain stada vidlonder da chattar ina soluziun en chaussa.

Tenor il iniziants in'offaisa envers il dretg d’iniziativa

Ils iniziants na vulan en nagina maniera acceptar questa argumentaziun da la vischnanca e resguardan quest agir sco offaisa envers il dretg d'iniziativa e surtut envers las passa 500 persunas, che han suttascritg lur iniziativa en temp da record. Perquai pretendian els, che tant la voluntad dal pievel sco er la constituziun vegnian respectadas. Sche quai na vess betg dad esser il cas pondereschan ils iniziants tut tenor anc pass giuridics.

Tenor ina posiziun provisorica da l'Uffizi da vischnancas ha Scuol raschun cun ses agir. Ina resposta definitiva en scrit vegn spetgada l'emna proxima.

RR actualitad 11:45

Tge che l'iniziativa vul

«Dapli per cumprar – damain per parcar» pretenda plazzas da parcar gratuitas en tut la vischnanca da Scuol. L'iniziativa è vegnida inoltrada cun passa 500 suttascripziuns ils 28-06-2016 sco emprima en la nova vischnanca fusiunada da Scuol. Tenor la constituziun communala avess ella stuì vegnir tractada entaifer in onn, vul dir enfin ils 28-06-2017.