Siglir tar il cuntegn

Engiadina Dissonanzas en suprastanza communala da San Murezzan

La commembra da la legislativa, Anita Urfer, ha demissiunà sco presidenta da la cumissiun da planisaziun halla da chavaltgar, ils 5 da mars cun effect immediat. Vegnì enconuschent è quai dentant pir a la davosa sesida dal parlament da San Murezzan.

halla da chavaltgar San Murezzan
Legenda: La halla è entant serrada dapi il 2013. RTR, Anna Caprez

Il cussegl communal da San Murezzan ha numnadamain gì dad eleger in remplazzant per Anita Urfer en la cumissiun. Elegì è lura vegnì il president communal Sigi Asprion. La desditga dad Urfer n’è dentant betg stada propi voluntaria.

Dumonda da recusaziun

Ils quatter commembers dal gremi hajan gì l’impressiun che Urfer haja agì a maniera partischanta e saja s’engaschada memia fitg per ina soluziun en connex cun in concept per reanimar la halla da chavaltgar a San Murezzan e ch’ella haja sustegnì ed infurmà memia fitg ils investiders interessads enturn il project Futura. La suprastanza communala ha perquai giavischà che Anita Urfer, la presidenta da la cumissiun, sa retegnia da sia vusch, cura che la suprastanza tractia il project.

Lià ils mauns

Suenter quella decisiun ha Anita Urfer decis da demissiunar per immediat sco presidenta da la cumissiun, perquai ch'ella n'aveva pli avunda cumpetenza ed infurmaziuns per pudair decider en chaussa. En ina brev ch’ella ha prelegì al parlament accentuescha Urfer, ch’ella haja adina agì en l’interess da la vischnanca da San Murezzan. Ella n’haja era nagins interess privats u finanzials vi da la gestiun da la halla da chavaltgar. Anita Urfer na candidescha betg pli il settember per in'ulteriura legislatura en suprastanza communala. Quella decisiun haja ella dentant tratg gia ditg avant il mars.

Stabiliment da sport dal 1910

La halla da chavaltgar sper il Lai da San Murezzan è en possess da la vischnanca dapi il 1990. Cun quai ch’il tetg è periclità da crudar ensemen, na vegn la halla betg pli duvrada per il sport da chaval – e quai gia dapi il november 2013. Per sanar e reinvestir en l’edifizi, ha la vischnanca tschertgà soluziuns cun investiders privats. Entant è il project «Reithalle Futura» anc sco unic en cursa.

RR novitads 12:00