La suprastanza dal circul d'Engiadin'Ota vul puspè discutar la dumonda dad ina eventuala fusiun da vischnancas. Quai suenter che in abitant ha inoltrà ina petiziun che pretenda da furmar ina gruppa da lavur per ina proposta dad ina constituziun dad ina vischnanca fusiunada en Engiadin'Ota. La suprastanza dal circul vul tractar la petiziun durant la sesida dal parlament regiunal ils 30 d'avrigl. Per il landamma da l’Engiadin’Ota è ussa l’ultim mument ch’ins po discutar la chaussa avant che il circul n’exista betg pli pervia da la refurma da las regiuns.
Per pudair tractar la petiziun propona la suprastanza dal circul da revocar la decisiun dal parlament dal 2010. Lezza giada aveva decidì il Cussegl cumön da renunziar sin tractativas e discussiuns da fusiun. Tractativas duain pir esser pussaivlas suenter ina votaziun da principi dal pievel. Quai aveva decidì il parlament regiunal per betg stuair laschar vuschar davart ina iniziativa da la Partida populara svizra che pretendeva ina votaziun dal pievel avant che discutar davart ina fusiun eventuala.
PPS è cuntenta
La PPS Engiadin’Ota è cuntenta che sia iniziativa duai ussa vegnir avant il pievel. Il president da la PPS Engiadin’Ota, Mario Salis, ha ditg a Radiotelevisiun Svizra Rumantscha ch'el saja anc adina persvadì che la populaziun vegn a dir na a l’idea d'ina fusiun. Sch'i vess dentant da dar in gea sche po Salis s’imaginar che la PPS mida idea e collavura tar in project da fusiun.