En Engiadina datti 2 facits dals dis da festa 2015/16 ch'èn restads senza naiv natirala. Ils giasts vegnan era senza naiv natirala. Pendicularas ston dentant pudair producir avunda naiv artificiala, sch'ellas na vulan betg restar senza giasts.
Destinaziuns pli u main cuntentas
La destinaziun Engiadina San Murezzan è magari cuntenta cun ils dis da festa en Engiadin'Ota. Ils hotels ed ils affars hajan fatg bunas svieutas, ha ditg il pledader Roberto Rivola a Radiotelevisiun Svizra Rumantscha RTR. Las pendicularas da la regiun Corviglia Marguns hajan preschentà fitg bunas pistas, e quai saja stà in magnet per la glieud. Dentant haja la glieud era giudì autras offertas sco ir cun patins sin lais natirals.
En Engiadina Bassa è la destinaziun main cuntenta. I haja dà hotels cun buns resultats, dentant era auters cun nauschs resultats. Surtut sa mussa dentant per Niculin Meyer da la destinaziun Engiadina Scuol, ch'ils giasts san far vacanzas d'enviern era senza naiv natirala.
Pendicularas cun resultats differents
Tar las pendicularas datti prest schon ina societad da duas classas: las pendicularas che han investì fitg bler en sistems d'ennaiver e las pendicularas che na pon betg producir avunda naiv artificiala. Uschia annunzian las pendicularas Engiadina Mountains en Engiadin'Ota in resultat cun in minus da radund 8% tar las primas entradas sur ils dis da festa - quai grazia al fatg ch'ellas han pudì innaiver quasi tut las pistas. Era a Samignun èn ins cuntent cun ils dis da festa grazia a la naiv artificiala. Da l'autra vart datti pendicularas sco la Corvatsch Sa u Minschuns en Val Müstair che ston notar in minus da 65% tar las primas entradas. Quai pervia ch'ins n'ha betg pudì producir avunda naiv artificiala per avair ina buna offerta da pistas avertas.