Ils organisaturs da las tradiziunalas cursas han gì da cumbatter cun plirs facturs negativs influenzads da l’aura las ultimas emnas.
Cumbain che la vetta da glatsch dal lai ha ina grossezza da 40-60 cm e porta da principi bain tut il pais da l’infrastructura, han la naiv e las temperaturas chaudas fatg in stritg tras il quint da l’emprima dumengia da cursas.
Stritgar, scursanir, adattar
La pista è stada memia loma e cun quai er memia privlusa per chavals e chavaliers. Tar las cursas da la segunda dumengia da White Turf han ils organisaturs gì da scursanir l’oriund traject da cursa ed il spustar per plirs meters. Pitschnas modificaziuns haja er dat tar l’ultima fin d’emna, di il vicepresident da la societad «Rennverein St. Moritz», Luigi Sala. Tuttina sajan ins cuntent ch’ins ha pudì trair tras las cursas grondas cun premis fin 111’111 francs.
In onn extraordinari per nus: chaud e difficil.
Tegnair aut la flexibilitad
In vista a la proxima ediziun dal White Turf San Murezzan che vegn spustada per in’emna causa las mastranzas mundialas da skis 2017, hajan ins dad ir sur ils cudeschs. Quai surtut a reguard l’infrastructura sin il lai cun las numerusas tendas. Ch’ins veglia daventar pli flexibel a reguard las installaziuns fixas ma er tar la pista da cursas.
Segirtad d’indemnisaziun
Quant che tut las investiziuns da las ultimas emnas han custà l’organisaziun e quants raps che mancan en la cassa causa ch’ins ha gì da stritgar in entir di d’occurrenza, na poss ins anc quantifitgar, uschia Luigi Sala. Dentant possedia l’organisaziun da White Turf ina segiranza d’indemnisaziun che vess da surpigliar almain ina part dals custs.