La realisaziun da la pli gronda sculptura da glatsch dal mund ha cumenzà ils 21 da november 2017 cun in mantun da naiv. Entaifer las proximas trais emnas duai daventar londerora il «Olympia Bobrun San Murezzan-Schlarigna», l’unica pista da bob natirala dal mund.
Agid da maschinas
La lavur per ils construiders da la pista da bob è sa midada ils ultims decennis, ha declerà il directur da l’Olympia Bobrun Damian Gianola. En congual cun las fadias d’avant 100 onns, dettia oz almain agid da pliras maschinas che transportan la naiv fin sin il lieu. Ed er la producziun da naiv è entant pussaivla e tutga tar il repertori per realisar la pista da 1'722 meters lunghezza.
Lavur a maun per ils detagls
La construcziun pretenda blera experientscha ed in bun egl. Ils lavurers, per gronda part persunas che derivan dal Tirol dal Sid, hajan precis quella savida e lavurian cun premura vi da mintga singul detagl da la pista da bob tranter San Murezzan e Schlarigna.
Buna situaziun da partenza
Allegraivel è per ils responsabels da l’Olympia Bobrun San Murezzan-Schlarigna che las temperaturas èn per entant bel bassas, uschia ch’ins ha pudì producir naiv cun ils chanuns per la pista. La finala vegn furmà or da 15’000 m3 naiv e 7’000 m3 aua la pli gronda sculptura da glatsch dal mund.
Mintg'onn ina nova pista
La pista vegn fabritgada mintg’onn danovamain e malgrà che mintga storta dal traject è nivellada precisischem, datti adina puspè in midament minim da la pista. L’avertura da la stagiun d’enviern 2017/18 dal «Olympia Bobrun San Murezzan-Schlarigna» è prevesida per ils 17 da december 2017.
RR actualitad 11:00
