Per 22 milliuns francs duai la plazza aviatica Samedan vegnir modernisada. Stan actual da quests plans: il project saja surdimensiunà e stoppia per quest motiv vegnir surlavurà anc ina giada. Nagins cumpromiss vulan ils responsabels dentant far tar ils plans da la saiv.
La saiv
Co duai la saiv enturn la nova plazza aviatica a Samedan vesair or? Questa dumonda procura anc adina per chaus cotschens en Engiadin’Ota.
Schebain ch'i na dat nagina lescha che prescriva ina saiv massiva enturn la nova plazza aviatica, proclameschan ils responsabels exact ina tala. Mo cun ina saiv d’ina tscherta grondezza saja garantida la segirtad, haja num.
Naginas cartas avertas
Dentant datti era vuschs criticas che cumbattan ina tala saiv massiva. Per exempel il «FORUM ENGADIN», ina societad che sa metta en per la protecziun da la cuntrada. Lur objecziun principala, ils responsabels da la plazza aviatica na giogan betg cun cartas avertas e pretendian per sbagl ch'i dettia sulet ina varianta pussaivla co la saiv duai vesair or. Dentant na saja l’apparientscha actualmain anc insumma betg definida.
TR Telesguard 17:40