Engiadina - Dapli segirtad per visitaders dal Parc Naziunal Svizzer
Il Parc Naziunal Svizzer e la vischnanca da Zernez vulan meglierar vinavant la situaziun da segirtad enturn ils parcadis sin la via dal Pass dal Fuorn. En ina fasa da pilot aveva la vischnanca introducì tempo 60 e in scumond da surpassar.
Uss duajan quest limit da tempo da 60 sin l’autezza dals parcadis sin il pass dal Fuorn ed il scumond da surpassar vegnir introducids permanent. Quai sco reacziun sin in’expertisa che concluda che la situaziun da segirtad saja parzialmain insuffizienta, quai scriva la vischnanca da Zernez.
Las mesiras duajan ir en vigur a partir dal prim da zercladur 2017 ha quai num en la communicaziun. Il limit da tempo vala mintgamai tranter l’entschatta da zercladur e la fin d’october.
