Il minz da la gruppa è da la partida dapi la fundaziun dal 1991. En occasiun da la festa da 700 onns Confederaziun avevan ils Engiadinais fundà la gruppa. La batgetta musicala en maun ha il schef da la polizia San Murezzan Ruedi Pichler. El vegn sustegnì da l’anteriur directur da cura da San Murezzan Hans Peter Danuser. Da la partida tar l’ensemble da tibas Engiadina-San Murezzan èn plinavant Mario Salis, Urs Fiechter, Annina Schläpfer e Hadrawa Klinke.
La tiba è buna d’avrir bleras portas
Grazia a lur concerts hajan ins immediat ina colliaziun cun la glieud ed uschia era gì savens bler pli simpel da contactar las dretgas persunas en il gist mument. Uschia na viagia Hans Peter Danuser mai senza sia tiba.
La tiba ha avert pli u main mintga porta durant mes viadis da publicitad per l’Engiadina.
Per porscher ina paletta vasta al public, vegnia exercità ina giada l’emna, ha declerà Gian Nuot Tschander che è in dals anteriurs suna-tibas, el vegn adina puspè a gidar or a l’ensemble. Il repertori na consista betg be da chorals, mabain er da valzers, marschas, polcas e tocs classics da Schubert, Rossini, Verdi, Brahms u Charpentier.
Gronda festa cun plirs ambassadurs
En occasiun dal giubileum da 25 onns Ensemble da tibas Engiadina San Murezzan, vegn fatg festa la fin d’emna dals 13 e 14 d’avust 2016 a Segl e San Murezzan. Tranter ils giasts envidads duain er esser preschents plirs ambassadurs ch’ils sunatibas han gia visità durant lur viadis tras il mund.
Suns e tuns en las muntognas
Suenter pliras represchentaziuns sin las muntognas Corviglia, Marguns, Corvatsch, Furtschellas, Diavolezza, Languard e Muottas Muragl, envida la gruppa ad ina sairada cun concerts dals Engadiner Ländlerfründa, Las Lodolas e l’ensemble sez en l’hotel Laudinella a San Murezzan. La dumengia èn ils sunatibas silsuenter a Segl en acziun.
