Siglir tar il cuntegn
Inhalt

Engiadina Damain retgav per las pendicularas Motta Naluns a Scuol

Radund 8 % damain retgav per l'onn da gestiun 2014/2015.

la pendiculara Motta Naluns SA
Legenda: Damain retgav per las pendicularas Motta Naluns SA Passa 8% damain retgav per las pendicularas Motta Naluns SA. ANR

Las pendicularas Motta Naluns SA han ragiunt radund 8% damain retgav per l'onn da gestiun 2014/2015. Empè da radund 15 miliuns francs, hai dà anc radund 13,7 miliuns francs retgav. Er il gudogn è sa reducì, da radund 4,4 miliuns francs sin anc radund 3,5 miliuns francs.

Sonda, ils 3 d'october ha approvà la radunanza d’acziunaris il rendaquint, era sche il resultat na saja betg cuntentaivel. Per pudair investir en avegnir sco previs, na cumportia quai betg pli blers regress da gudogn en quella dimensiun ha ditg il cussegl administrativ.

Start difficil ed ina rusna durant il mars

In motiv per las nauschas cifras saja stà la situaziun difficila cun pauca naiv il cumenzament da l'enviern 2014/2015. Cunquai ch'i n'aveva betg navì durant il december, han las pendicularas stuì ennavar cumplettamain las pistas per insumma pudair avrir il territori da skis cun retard ils 18 da decmeber. En pli hai dà tenor il cussegl administrativ bler damain giasts durant il mais mars 2015.