Da Berna a S-chanf per la radunanza communala

«Il viadi da 4 uras da Berna a S-chanf è lung», di Duri Campell la saira curt avant la radunanza communala. Quella è gist en l'emna da sessiun a Berna. In program intensiv per Campell, ma in ch'el fa gugent.

Duri Campell

Legenda da maletgs: Duri Campell RTR, V.Schmed

Per paucas uras è Duri Campell vegnì da la chapitala Svizra en sia patria S-chanf per ina seduta da suprastanza e manar la radunanza communala. Duri Campell ha tut sut controlla. Tema da perder la survista, na haja el betg. «Tut ina dumonda da l'organisaziun e la voluntad», di il cusseglier naziunal da la PBD. E quella è gronda tar Campell. El fetschia pitschens pass, ma tuts cun plain engaschi, uschia l'um da 52 onns.

Bilantscha suenter in onn

L’atun da l'onn che vegn vul Duri Campell far ina prima bilantscha ed uschia respunder la dumonda principala: va quai - esser cusseglier naziunal ed il medem mument president communal, pur e persuna privata cun ina famiglia?

Era èn elecziuns communalas il november che vegn. Sch'el candideschia puspè sco president e sche la populaziun vul el vinavant vegn a sa mussar.