L’emprim cun il bike alura cun skis. La cursa cumenza cun in traject sin duas rodas e finescha cun in slalom gigantesc. 1,5 km absolvan ils participants cun il bike davent dal biro da la scola da skis a Zuoz fin tar la staziun da muntogna dal runal «Survih». Suenter han ils sportists da midar stgarpas e dad ir tras in slalom gigantesc da bun 400 meters lunghezza.
Affars da sport dattan bikes per la cursa
Per che tuts possian sa participar a «La Cumbineda» han ins organisà grazia ad affars da sport en tut l’Engiadina bikes che stattan a disposiziun. Cun quai ch’il midament da las stgarpas vegn ad esser ina da las pli gronda sfidas da la cursa, han ils organisaturs limità la vegliadetgna tar ils uffants. A partir da 10 onns pon quels far la cursa dubla che è pli curta co quella dals creschids.
L’emprima ediziun da «La Cumbineda» cumenza la mesemna, ils 30 da december 2015, a las 14.00 uras sin il territori da skis da Zuoz.