Las sbuccadas dals lais da Segl e Champfèr èn lieus ideals per far mintg’onn la pestga da fraja. Per las guardias pestga da l‘Engiadin’Auta èn quels lieus però er ideals per far la pestga cun raits enstagl cun forza electrica. Quai grazia a la largezza ideala dal flum e la pauca crappa sin il fund. Il lieu è dentant unic e perquai san els duvrar questa metoda mo là.
Pestga da fraja - per garantir ina populaziun da peschs intacta
Atun è il temp, nua che las litgivas d’aual mettan giu lur ovs per laschar fructifitgar els. Ma na betg en tut ils lieus datti or da quels ovs era peschs giuvens. Oravant tut en parts dal flum, che vegnan controlladas dal uman, per exempel pervi dad ovras idraulicas, po l’entira fraja ir en malura sche l’aua vegn sbassada dad in mument a l’auter.
Las stivas da peschs
Perquai vegnan mintg’onn tratgas si ina massa da litgivas en las differentas stivas da peschs en il chantun. Per pudair far quai ston las guardias pestga tschiffar mintg’atun pliras litgivas cun ovs madirs. En la stiva da peschs vegnan quels ovs lura tratg giu e fructifitgats. Sut cundiziuns idealas pon lura sa sviluppar or da quels ovs sur enviern giuvens peschs che vegnan relaschads la proxima stad puspè en libertad.