Siglir tar il cuntegn
Inhalt

Engiadina Critica per project d’in hotel da sanadad

10 interpresas e persunas privatas han inoltrà lur argumentaziuns encunter la planisaziun locala «Serletta süd» tar la vischnanca da San Murezzan. Sin quel areal duess vegnir realisà in nov hotel da sanadad ed ina nova dimora per la clinica Gut che è dapi 13 onns en tschertga d’in nov lieu.

Project Serletta San Murezzan
Legenda: L'hotel projectà na vulan ils dus hotels vischins betg acceptar uschia sco preschentà mad

Surtut ils dus hotels da 5 stailas Kulm e Palace a San Murezzan n’èn betg d’accord cun ils plans da la Chris Silber St. Moritz SA che è possessura da l’areal «Serletta süd».

Sco quai che la Südostschweiz scriva, hajan las direcziuns dals dus hotels preschentà ina soluziun da cumpromiss e pretendan ch’il project vegniss reducì per 17,5 meters. Quai n’è tenor Martin Meyer, il manader da project betg realistic ed era betg realisabel.

Decisiun decisiva

Il cussegl communal da San Murezzan vegn a tractar il project ils 27 d’avust 2015. La populaziun duai suenter decider a l’urna ils 18 d’october davart la revisiun da la planisaziun locala.

Per la Clinica Gut è quai ina votaziun decisiva. Tenor il CEO Adrian Urfer, avess la clinica da bandunar San Murezzan, sch’il project vegniss impedì vinavant. Quai scriva la Chris Silber St. Moritz SA en ina communicaziun. 130 plazzas da lavur giessan a perder cun la clinica, ulteriuras 80 na vegnissan betg realisadas cun il nov hotel.