Siglir tar il cuntegn
Inhalt

Engiadina Critica per center da requirents d'asil en Val Müstair

Las uniuns Gastro Val Müstair e l'Uniun da mastergn e commerzi Val Müstair vesan problems per il turissem pervi dals requirents d'asil en Val Müstair.

Chasa Muntanella a Valchava
Legenda: En la chasa Muntanella a Valchava vivan radund 45 requirents d'asil. RTR/D. Spinnler
Chasa Muntanella
Legenda: La chasa Muntanella a Valchava RTR/D. Spinnler

Il contract tranter il chantun Grischun e Werner Braun per la chasa Muntanella sco center per requirents d'asil dura anc fin la fin d'avrigl. Ussa han las uniuns Gastro Val Müstair e Uniun da masteranza e commerzi Val Müstair scrit ina charta a cusseglier guvernativ Christian Rathgeb. Las duas uniuns fan quitads che il turissem pateschia da la preschientscha dals radund 45 requirents d'asil a Valchava.

«Giasts schoccads»

Concret scrivan las uniuns che ils giasts che arrivian en Val Müstair sajan schoccads e consternads e che l'attractivitad da la Val Müstair sco lieu turistic sa sbassia da maniera massiva. Sin dumonda da Radiotelevisiun Svizra Rumantscha RTR ha ditg la presidenta da l'Uniun da masteranza e commerzi Val Müstair, Gabriella Binkert Becchetti, ch'il senn da la charta saja en prima lingia da procurar ina communicaziun clera davart dal chantun. Ins veglia savair sche ils requirents d'asil restian ussa vinavant u sche il center vegnia serrà la fin d'avrigl.

Il cusseglier guvernativ Christian Rathgeb ha confermà dad avair survegnì la charta. El na veglia dentant betg commentar quella pervia ch'ins saja actualmain en discussiun cun las partidas involvidas.

Rathgeb ha era ditg envers RTR ch'el haja survegnì resuns positivs davart l'andament dal center per requirents d'asil en Val Müstair. Schebain il center restia vinavant en funcziun na saja anc betg decidì definitivamain.