Critca envers imposta da 2. abitaziuns a Silvaplauna

Tant possessurs da 2. abitaziuns sco era ils iniziants indigens che vulan abolir l'imposta na van betg d'accord culla proposta nova.

Silvaplauna

Legenda da maletgs: Discussiuns a Silvaplauna pervi da l'imposta sin 2. abitaziuns. La nova proposta da la suprastanza communala vegn crititgada ferventamain. Keystone

Ils possessurs da 2. abitaziuns a Silvaplauna na van betg d'accord culla nova proposta per ina imposta sin 2. abitaziuns. Bruno Suter, in dals possessurs che han cumbattì l'imposta fin davant il tribunal federal, ha ditg envers Radiotelevisiun Svizra Rumantscha RTR che ils possessurs da 2. abitaziuns vulan anc adina che l'imposta na vegnia betg introducida. I na possia betg esser che ils possessurs da 2. abitaziuns stoppian pajar ina imposta, las abitaziuns fittadas ed ils hotels percunter betg. Suter ha ditg che el preferiss in augment da la taxa da cura. Quai fiss tenor el ina soluziun pli egualisada.

Iniziativa per abolir l'imposta resta

Era ils iniziants indigens che vulan abolir l'imposta na van betg d'accord cun la proposta da la suprastanza communala. Romina Reich da la gruppaziun dals iniziants da Silvaplauna ha confermà envers RTR che els na vegnan betg a retrair lur iniziativa. Els hajan ramassà bleras suttascripziuns per l'idea dad abolir l'imposta. Quellas obligheschian da s'ingaschar vinavant per abolir l'imposta. L'imposta per 2. abitaziuns portia in nausch image a la vischnanca e pisseria che giasts fidaivels vegnian grittentads.

La vischnanca aveva preschentà ils 7 da schaner ina nova proposta per ina imposta sin 2. abitaziuns. Quella prevesa che era l'agen diever dad ina abitaziun quinta per reducir l'imposta. Tgi che drova l'abitaziun dapli che 45 dis duai pajar be anc la mesadad da l'imposta. Tgi che ha occupà sia abitaziun dapli che 90 dis na duai insumma betg pli stuvair pajar l'imposta. L'imposta importass 2 promils da la valur che l'abitaziun ha per la taglia sin la facultad.