Siglir tar il cuntegn
Inhalt

Engiadina Contract da cumpra per resort Biosfera La Sassa sut tetg

La Domenig Immobiglias SA ha cumprà da la vischnanca da la Val Müstair ina parcella a Tschierv. Sin quella vulan ils investiders da Cuira realisar il resort Biosfera La Sassa en la Val Müstair.

dus umens che sa dattan il maun
Legenda: Il president communal da la Val Müstair, Rico Lamprecht e Jon Domenig, da la Domenig Immobiglias SA. mad

Per la vischnanca da la Val Müstair è quella vendita in cler signal da la famiglia Domenig, uschè il president communal Rico Lamprecht. Cun l'acquist dal terren tras la Domenig Immobiglias SA hajan ins fatg in proxim pass per realisar il resort a Tschierv.

Midament da zona

Per ch'ils investiders da Cuira possian realisar il project da radund 35 milliuns francs en la Val Müstair, ha la populaziun d'approvar en in proxim pass il midament da zona. Quai è previs per la primavaira che vegn, uschè Rico Lamprecht. Previs è da realisar a Tschierv in cumin da vacanzas cun 400 letgs. Per cumplettar quella spierta è previs da fabritgar in nov access en il territori da skis Minschuns e la pista da l'Alp da Munt a Chalchera duai vegnir ennavada.

Sche tut va tenor ils plans dals investiders ed era da quels da la vischnanca da la Val Müstair, vul ins cumenzar il 2019 cun la realisaziun dal project Bisofera La Sassa a Tschierv.

RR novitads 17:00