Siglir tar il cuntegn

Engiadina Commerzi e mastergn regiun Landeck fa reclama en Engiadina

Dacurt e vegnì en tut l’Engiadina e la Val Müstair ina broschura cun 36 paginas da la societad da commerzi e mastergn da la regiun Landeck. Cun quella fan differentas interpraisas publicitad per lur purschidas.

prospects
Legenda: Posta da l'Austria che n'ha betg fatg plaschair als affarists en Engiadina. RTR, R. Mayer

Passa 40 firmas da Fond/Pfunds enfin Zams fan reclama per radund 200 products austriacs en Engiadina. Ils affarists dal Tirol emprovan cun quest’acziun da profitar da la situaziun dal ferm franc svizzer.

In cumbat per mintga client

Ils affars, surtut da l’Engiadina Bassa, cumbattan gia dapi sur in onn cun la concurrenza sur il cunfin, quai pervi dal curs bass da l’euro. L’acziun da commerzi e mastergn da la regiun Landeck è perquai fermamain contraproductiva per l’economia da l’Engiadina. Quai è la valitaziun da Claudio Andry. El è president da la societad da commerzi e mastergn Engiadina.

Er il sviluppader regiunal Engiadina Bassa e Val Müstair, Andrea Gilli, è stà stut da la moda e maniera da la reclama per purschidas austriacas en l'Engiadina.

Tgi che va a far cumissiuns dador cunfin, sa sto esser conscient, ch’el metta en privel plazzas da lavur in Engiadina
Autur: Andrea Gillisviluppader regiunal Engiadina Bassa / Val Müstair

Sco Claudio Andry ha declerà ad RTR vul ins sviluppar a la proxima radunanza generala da la societad da commerzi e mastergn, tgeninas mesiras ch’ins po trair per dar cunterpais a l’acziun austriaca e per megliurar la situaziun economica in Engiadina.