Siglir tar il cuntegn
Inhalt

Engiadina Collavurar u fusiunar en Engiadin'Ota?

Suenter gieus olimpics e la promoziun da la cultura han las partidas regiunalas da l'Engiadin'Ota organisà in terz Tavulin cun il tema collavuraziun regiunala. Igl è dentant era vegnì discutà davart ils avantatgs d'ina fusiun.

Legende: Audio Mezdi: Tavulin da partidas – collavurar u fusiunar en Engiadin'Ota abspielen. Laufzeit 03:01 Minuten.
03:01 min, Actualitad dals 09.11.2018.

Var 70 persunas èn sa participadas al terz Tavulin, ina plattafurma da discussiun organisada da las partidas regiunalas. En differentas gruppas èsi vegnì discutà davart temas sco l'infrastructura regiunala, la natira ed il turissem u structuras politicas.

Dasper las discussiuns han duas referats tractà il tema fusiun. Carmelia Maissen ha raquintà da sias experientschas sco presidenta communala da la vischnanca fusiunada Glion e Curdin Derungs, professer a la HTW, ha referì davart strategias per la collavuraziun regiunala.

Collavuraziun gea - fusiun pertge betg

Il facit suenter la sairada da discussiun è stà ch'il tema fusiun sto puspè vegnir sin maisa en Engiadin'Ota. Cura ed en tge furma è anc avert.

I saja stà bel da vesair ch'il tema possia vegnir discutà senza emoziuns ed en furma constructiva, ha Franziska Preisig da la Glista Libra constatà en la runda finala.

Ch'il pled "fusiun" ha puspè pudì vegnir duvrà avertamain ha era Thomas Nievergelt, president dal PLD constatà cun gust.

Discussiuns da fusiun èn tuttina delicatas en Engiadin'Ota, suenter che la populaziun ha acceptà dal 2015 ina iniziativa che pretenda da betg daventar activ en chaussa fusiun enfin che il suveran n'ha betg decidì da principi per u cunter ina fusiun.

Igl è però era per Gian Marco Tomaschett, president dal PPS impurtant da manar la discussiun, mo cun quella saja quai pussaivel da vegnir enavant, ha el ditg.

Proxims pass

Ils presidents e las presidentas da partida vegnan sco proxim a discutar las ideas dal Tavulin. Els tschertgian era la discussiun cun la destinaziun Engiadina San Murezzan e la vischnanca da San Murezzan ch'èn era en discussiuns da strategia per guardar, tge temas ch'occupan a tuts. E lura datti tut tenor in ulteriur Tavulin cul tema fusiun, quai saja dentant anc avert.

Cler saja per ils presidents da partida ch'igl è anc memia baud dad ir la via politica.

RR novitads 06:00