En il Grischun datti passa 600 lais e sur 12'000 kilometers flums ed auals. Durant ils ultims 20 onns èn capitads passa 150 accidents en e sut aua. Il dumber zuppà saja anc bler pli aut. Tar differents da quests accidents eran en acziun ils sfunsaders da polizia – dapi il prim d'october dal 2017 èn els dentant abolids.
Ils sfunsaders dal chantun Son Gagl han uss l'incumbensa da far quest servetsch. Ch'ils policists han da vegnir dad ordaifer vegn betg stimà da tuts.
Er l'Engiadin'Ota ha pissers
L'Engiadin'Ota è cun ses lais gronds in magnet per turists, aspectaturs ed occurrenzas sin ni sper l'aua.
Da fanadur enfin settember da quest onn han per exempel gì lieu 37 occurrenzas sin ils lais en l'Engiadin'Ota. Il fatg ch'ils sfunsaders da polizia da Son Gagl avessan da rivar en l'Engiadina en cas dad in accident, è dispitaivel.
Ils pumpiers Trai Lejs da Silvaplauna e Segl èn sa preparads
Differentas persunas dals pumpiers Trais Lejs han il sfunsar sco hobi privat. Els fan adina puspè curs cun l'anteriur schef sfunsader da la polizia, Urs Grigoli. Els pudessan gidar tar in accident sut aua. La dumonda è però, sch'els dastgan gidar – pervi da dumondas da la segiranza.
Concept chantunal enfin 2018
Dapi l'onn 2009 spetg'ins in concept che regla tut las dumondas en connex cun salvament sur e sut aua. Christian Rathgeb, il schef dal Departament chantunal da giustia, segirezza e sanadad ha realisà la necessitad e vul avair in concept chantunal enfin l'onn 2018.
RR actualitad 17:00