Siglir tar il cuntegn
cuntegn

Engiadina Co duai l'avegnir dal turissem en Engiadin'Ota vesair ora?

La nova strategia da la destinaziun turistica Engiadina San Murezzan duai sa basar sin las duas marcas «San Murezzan» ed «Engiadina». Tant è cler. Co ch'ils detagls duain vesair ora duai decider in process avert, in uschenumnà process dad Open Innovation.

In tal process è nov en la tschertga d'ina nova strategia per ina organisaziun da turissem. El è dentant impurtant per il directur Gerhard Walter:

Il pli impurtant è per mai il focus sin il communabel.
Autur: Gerhard WalterCEO Engiadina San Murezzan

La nova strategia na duai betg vegnir formulada davos portas serradas, mabain duain turistichers, experts ed er giasts ed indigens sa participar. Perquai vegn activada damaun mesemna ina plattafurma online, nua che in e scadin po deponer sias ideas e valitar e discutar ellas.

Uschè bleras persunas sco pussaivel duain sa participar per survegnir ina basa uschè vasta sco pussaivla, di Gerhard Walter. Ses giavisch fiss, che almain 1'000 persunas inoltreschan lur ideas sin la plattafurma.

Urari da temp stretg

Enfin ils 5 da december è la plattafurma averta e gia ils 14 da december duai la nova strategia lura vegnir preschentada. Gerhard Walter empermetta malgrà l'urari stretg che las ideas duain tuttas vegnir integradas en la nova strategia u vegnir rimnadas per pli tard.

En vigur duai la nova strategia ir il prim da schaner 2018 cur che la destinaziun daventa ina societad d'aczias.

RR actualitad 17:00