Cun la Chasa Moser ha la Clinica holistica Engiadina s'engrondì per in ulteriur edifizi, sin total quatter. En la chasa engiadinaisa vis-à-vis la chasa principala, ha la clinica privata realisà per 6 milliuns francs novas localitads per biros, ina halla da raiver e stanzas da terapia.
Schelar per guarir
Tenor il president dal cussegl administrativ da la Clinica Holistica Engiadina, Mattias Bulfoni, saja la terapia da «cryo» ozendi la nova metoda per vegnir a frida cun differentas malsognas. Tranter auter er dolurs, depressiuns u disturbis dal sien.
Jau hai sez empruvà ora la cabina che vegn sfradentada giu sin 110 grads sut nulla. Uschè bain n’hai jau betg pli durmì dapi passa 30 onns.
Ultra da la nova purschida cun temperaturas fraidas en la Chasa Moser, datti nov er ina cun chaudas en la chasa principala.
Fevra per dar forza
Tar la terapia dad ipertermia, vegn il corp stgaudà en in letg spezial sin ina temperatura da 38,2 grads. Quai rinforzia il sistem d’immun e gidia uschia er encunter depressiuns, suttastritga il schef-medi da la clinica, Michael Pfaff.
Cun realisar il nov bajetg, ha la Clinica Holistica Engiadina stgaffì er novs biros per il persunal. Quel era enfin uss da chasa en il tract principal. En consequenza èn vegnidas libras ulteriuras localitads per porscher plazza a novs pazients. Quai che fetschia er da basegn, uschia Mattias Bulfoni. La glista da spetga per ina plazza en la clinica saja anc adina fitg lunga.
Gia novs plans.....
Il favrer 2021 ha la clinica privata cumprà in ulteriur edifizi, la «Chasa Jassa». Previs è da colliar quella cun la clinica e realisar en il decurs da l’onn proxim ina nova cuschina e suitas per pazients privats. Il fundatur da la Clinica Holistica Engiadina, Mattias Bulfoni, discurra d’ina investiziun da var dus milliuns francs.
Actualmain èn 70 pazientas e pazients en la clinica a Susch. Il dumber d’emploiads saja entant creschì sin 140, uschia il fundatur tut superbi.
