Siglir tar il cuntegn

Engiadina Cler gea a fusiun da Gastro e Commerzi/Mastergn en Val Müstair

Las uniuns Gastro e Commerzi e mansteranza da la Val Müstair han decidì quasi unanimamain da fusiunar. Presidenta da la nova uniun fusiunada è Gabriella Binkert Becchetti.

Legenda: Guardar il video «Tuns moderads da l'uniun fusiunada Mansteranza e Gastro Val Müstair». Durada 1:53 minutas.
Or da Actualitad video dals 26.04.2016.

La decisiun a la radunanza da fusiun glindesdi saira è stada quasi unanima: cun 42 encunter 1 vusch han decidì ils commembers da l'uniun Gastro e da l'uniun Mansteranza e commerzi da la Val Müstair da fusiunar. La nova uniun sa numna «Uniun da Mansteranza e Gastro Val Müstair» e quinta radund 130 commembers. Presidenta è Gabriella Binkert Becchetti, enfin ussa presidenta da l'uniun Mansteranza e commerzi. Vicepresident è Pierre-René Grond, enfin ussa president da l'uniun Gastro.

Posiziuns pragmaticas

La presidenta da Mansteranza e Gastro Val Müstair Gabriella Binkert Becchetti ha ditg a Radiotelevisiun Svizra Rumantscha RTR che l'uniun fusiunada vul tschertgar soluziuns pragmaticas. Quai per las duas tematicas fitg actualas: la discussiun critica cun la destinaziun Engiadina Scuol Samignun Val Müstair, e la discussiun davart ils requirents d'asil che vivan en Val Müstair. Tenor Binkert vul la nova uniun discutar da maniera pragmatica cun la destinaziun turistica co ins savess meglierar la situaziun da marketing per la Val Müstair.

Cuntenta è la nova uniun tenor Binkert era cun la soluziun per l'avegnir dal chantun quai che pertutga il center per requirents d'asil a Valchava. Ins saja fitg cuntent ch'il chantun designescha sper il manader dal center anc ina persuna da referiment. Tenor Binkert è quai in success suenter che sia uniun aveva scrit ina charta al cusseglier guvernativ Christian Rathgeb. La charta aveva procurà per discussiuns. Quai pervia che la charta saja stada formulada da maniera rassistica. La charta na saja betg rassistica ha ditg Binkert envers RTR. Ella na scrivess dentant betg pli la charta uschia. Sch'ella avess da decider anc ina giada, contactass ella via telefon il cusseglier guvernativ.