La Giuventetgna Rumantscha GiuRu ha salvà sia radunanza generala sonda en Val Müstair. La radunanza ha reelegì il president Uolf Candrian ed ils suprastants Alina Müller, Flavia Hobi e Maurus Bundi.
Leander Albin è vegnì elegì sco nov commember en suprastanza. Sortidas da la suprastanza èn Natalia Salzgeber e Melanie Häfner.
En pli ha decidì la radunanza d'introducir ina contribuziun da partenza per daventar commember da la GiuRu. In nov commember sto en l'avegnir pajar ina contribuziun unica da 20.00 francs per daventar commember. Uschia spera la suprastanza da pudair persunalisar dapli il contact cun commembers. Quai che manca èn numnadamain persunas che fissan prontas da s'engaschar concretamain en l'uniun da giuventetgna per tut la Rumantschia, uschia il president da la GiuRu, Uolf Candrian envers RTR.
25avel giubileum
Quest onn po festivar la GiuRu ses 25avel giubileum. La suprastanza organisescha ina festa durant l'open air Chapella ils 6 d'avust. I duai dar dapli bands rumantschas a Chapella quest onn ed in tren special vegn a purtar ils commembers da la GiuRu en Engiadina a la festa da giubileum.