Siglir tar il cuntegn

Header

video
Elecziun: Sch'ins di A ston ins era dir B?
Or da Telesguard dals 25.05.2022.
abspielen. Laufzeit 5 minutas 22 Sekunden.
cuntegn

Circul Suot Tasna Cas Roner dat da discutar

Las discussiuns ed era la critica èn chapiblas – il nov sistem d'eleger deputadas e deputads per il Cussegl grond dovra dentant temp ed optimaziuns, di l'expert.

Igl è stà in terratrembel en il circul da Suot Tasna en l'Engiadina Bassa ils 15 da matg: Dus deputads n'èn betg vegnids reelegids – persuenter duas novas fatschas. Ina da quellas, Tina Roner, n'accepta dentant betg sia elecziun. Ella n'haja betg quintà da propi vegnir elegida, mabain vuleva be rimnar vuschs per sia partida – quai saja la finala l'idea dal proporz. Perquai haja ella era candidà «be» sco terza ed ultima sin la glista. Actualmain na saja betg pussaivel da cumbinar la lavur politica cun sia lavur internaziunala sco sviluppadra regiunala en regiuns da muntogna. Actualmain sa prepara la dunna da 35 onns en il Nepal sin sia proxima incumbensa a Bhutan.

En la regiun ed en las medias socialas ha questa decisiun dentant procurà per discussiuns, emoziuns e critica.

Sch'ina persuna sa metta a disposiziun, lura sto quella er esser pronta da surpigliar l'incarica.

L'expert per dumondas da democrazia Andreas Glaser ha chapientscha per la critica e las discussiuns enturn questa elecziun.

Sin l'emprima egliada pudess ins discurrer da cugliunim.
Autur: Andreas Glaser Directur dal Center da democrazia ad Aarau

El defenda dentant era il nov sistem d'eleger il parlament cun il proporz dubel – dal reminent in sistem ch'el ha evaluà ordavant sin incumbensa dal chantun. La populaziun dovria temp per s'endisar vid il proporz e d'acceptar ch'ina persuna cun pli paucas vuschs po vegnir elegida empè d'ina persuna cun dapli vuschs.

Andreas Glaser vesa dentant er potenzial per optimar il sistem: En l'avegnir pudessan per exempel las persunas che candideschan per in circul era stuair avair dimora en quest circul.

audio
Cas Tina Roner: Andreas Glaser metta a lieu
aus Actualitad vom 25.05.2022.
abspielen. Laufzeit 3 minutas 52 Sekunden.

Sez resta en mauns da la PS

Il sez da Tina Roner resta tar la Partida socialdemocratica, sco la chanzlia chantunala ha confermà envers RTR. Uschia po Aita Biert surpigliar il sez. Per ella n'èsi dentant nagin problem ch'ella n'abitescha betg en il circul Suot Tasna, mabain a Cuira. Per l'ina haja ella abità passa 20 onns en l'Engiadina Bassa e per l'autra haja ella anc adina lioms ferms cun la regiun, uschia Aita Biert envers RTR.

Cuira n'è betg New York – jau poss er represchentar l'Engiadina Bassa davent da la chapitala.
Autur: Aita Biert Nova deputada da la PS
audio
Suot Tasna: Tge din Tina Roner, Aita Biert e Andri Perl?
aus Actualitad vom 25.05.2022.
abspielen. Laufzeit 3 minutas 36 Sekunden.

Ils resultats dal circul Suot Tasna (incl la midada da Tina Roner ed Aita Biert):

RTR novitads 14:00

Artitgels legids il pli savens

Scrollar a sanestra Scrollar a dretga