Siglir tar il cuntegn
Inhalt

Engiadina Chastè da Tarasp bainbaud cun in nov possessur

Tant Not Vital sco era la famiglia Von Hessen èn cuntents cun il gea da Scuol als 200'000 francs per onn per il Chasté da Tarasp.

Fotomontascha cun il Chasté da Tarasp e l'artist Not Vital
Legenda: La cumpra dal Chastè da Tarasp tras Not Vital è sin buna via RTR

Not Vital ha ditg a Radiotelevisiun Svizra Rumantscha che el saja fitg cuntent cun il resultat cler. Cul gea da la vischnanca da Scuol, che sa participescha vi dals custs da mantegniment e da gestiun cun maximalmain 200’000 francs l’onn, è la cumpra dal Chastè da Tarasp in pass enavant. Dentant dettia quai anc da sclerir intgins puncts da la finanziaziun tranter el, Not Vital, e la famiglia possessura.

Era la famiglia Von Hessen è cuntenta

Philipp von Hessen che maina las tractativas da cumpra per la famiglia Von Hessen è era fitg cuntent, che ussa dependia tut be anc da las tractativas tranter la famiglia Von Hessen e Not Vital. La famiglia Von Hessen beneventia fitg l'idea da crear in center da cultura en il Chastè da Tarasp. Quai ha Von Hessen ditg envers radio SRF. Sper in center cultural internaziunal ch'è prevesì, vul Not Vital era promover la giuventetgna.