Divers onns ha la Chascharia Puntraschigna producì ses fondue da glatscher en l'anteriura furnaria da la butia Paun e Chaschöl amez la vischnanca da Samedan. Dapi quest atun vegn il fondue producì en l'anteriura chasa da maz en la zona industriala Cho d'Punt a Samedan.
Il motiv per la midada è tenor Christof Wüthrich, il vicemanader da fatschenta, che la chasa nua che la butia è en è venala. Suenter la vendita fissi intschert co i va enavant cun la butia.
Ina chascharia na classica
La Chascharia Puntraschigna producescha divers agens products sco fondue, raclette ed in mutschli, tuts sut la marca «da glatscher». La producziun da chaschiel è dentant plitost pitschna, cun bundant sis tonnas chaschiel mintga stad. Quai en la chascharia a Morteratsch, nua ch'ils signuns mussan co ch'ins fa chaschiel.
En il nov lieu da producziun han ins integrà ina pitschna chascharia. L'idea è da producir là en avegnir durant tut l'onn chaschiel, di Christof Wüthrich. Actualmain sajan ins londervi da far tests, surtut cun chaschiel lom.