Siglir tar il cuntegn

Header

cuntegn

Chasa da tgira Engiadin'Ota L'avust vegn vuschà davart il project Promulins a Samedan

Las vischnancas tranter Puntraschigna e S-chanf han da deliberar in credit da radund 40 milliuns francs per sanar e renovar la part existenta e per realisar en in segund pass ina nova part da la chasa da tgira a Samedan.

Il pli tard cura ch’ils votants han da decider davart ils credits da construcziun da las duas chasas da tgira, vegnia er ad esser cler sch’i dat ina u duas chasas da tgira en l'Engiadin’Ota, uschia il pledader da la Promulins SA, Jon Fadri Huder. Quai è a la fin era stada la quintessenza suenter la sairada d’infurmaziun a Samedan areguard il project Promulins.

I fa simplamain prescha

Radund 120 persunas èn stadas preschentas a l’infurmaziun davart ils differents pass ch’ins planisescha per ina nova chasa da tgira a Samedan. La gronda sfida saja da garantir durant tut il temp da construcziun ils 85 letgs ch’il Chantun prescriva. Per ils preschents – per gronda part glieud pli attempada u persunas che lavuran en la tgira – è simplamain cler ch’i fa nair da basegn che la chasa da tgira existenta a Samedan vegnia renovada ed engrondida uschè svelt sco pussaivel.

Emprima badigliada la primavaira 2020

Sche tut va tenor plan e las radunanzas communalas da las vischnancas da Schlarigna, Puntraschigna, Samedan, Bever, La Punt, Madulain, Zuoz e S-chanf din gea al credit, possian ins gia cumenzar cun il fabricat il matg dal proxim onn.

Opziun averta

Cun quai ch’il project prevesa era ina varianta cun 120 letgs, damai tants sco ch’il Chantun prescriva per tut l’Engiadin’Ota, resta ina porta anc adina averta, per il cas che las trais vischnancas da la part sura (Segl, Silvaplauna e San Murezzan) schessan da na a lur project Du Lac a San Murezzan. Quel duai vegnir il november a l'urna.

RR novitads 06:00

Artitgels legids il pli savens