Sin l'emprima egliada na para la chasa dad Aldo Puroger betg dad esser ina chasa speziala. La chasa a Fuldera d'Aint en la Val Müstair ha bain panels da solar sin il tetg, tge ch’ella po far, na tradescha ella dentant betg da dadora.
Indriz innovativ
Entant ch’ils ins panels da solar produceschan energia electrica, èn ils auters buns da producir energia termica. Tar tuts dus datti a la fin ina surproducziun, vul dir dapli energia che quai che la chasa dovra. Il surpli da la forza electrica po vegnir furnida a la rait publica. L’energia termica vegn ramassada en il venter da la chasa, en il terren sut ella. In grond tanc accumulescha l’energia producida la stad e l’enviern po quella vegnir duvrada cun agid d’ina pumpa da chalur. Tenor l’architect da la «chasa indigena Puorger» saja questa pumpa da chalur pli effizienta ch'ina pumpa da chalur usitada. Ella saja buna da producir or dad in kilowatt forza var 6 kilowatt chalur. Tar ina pumpa usitada resultian var 4 kilowatts.
Project da pilot sustegnì dal chantun
En congual cun ina normala pumpa da sondas, custia quest indriz var 40'000 francs dapli. Grazia la vendita da la surproducziun da la forza electrica s’amortiseschian quels custs cun ils onns, è Aldo Puorger persvas. Tenor l’um da 78 onns èn chasas da quest gener la soluziun per l’avegnir. Quai demussia er il fatg, ch’il chantun haja sustegnì finanzialmain il project. La chasa è er vegnida undrada cun il premi «PlusEnergieBau-Diplom 2022» da l’agentura solara Svizra. La sonda passada ha Aldo Puorger perquai avert las portas da sia chasa per la populaziun.